25.01.2024 kl. 13:00

Janúarráðstefna Festu 2024

@ Harpa, Silfurberg

Janúarráðstefna Festu er helsti viðburður Festu og stærsti árlegi sjálfbærniviðburður á Íslandi.

Yfirskriftin Við skrifum mannkynssöguna, vísar í þau tímamót sem við stöndum frammi fyrir og þær breytingar sem eru að eiga sér stað í rekstri og nýsköpun þegar kemur að sjálfbærni. 

Aðalfyrirlesarar verða erlendir sem innlendir sjálfbærnileiðtogar sem við gætum ekki verið stoltari að hafa fengið með okkur til liðs. Þetta eru leiðtogar sem hafa lýst leiðina, sagt hlutina hreint út og tosað aðra með sér. Í ár ætlum að leggja áherslu á félagslega hluta sjálfbærninnar og draga fram tækifærin sem liggja í þeim áherslum.

Það verður einnig nóg af stuði, skemmtun og húmor.

Dagskráin verður kynnt nánar næstu vikur, en tveir af aðalfyrirlesurum ráðstefnunnar hafa nú verið kynntir hér að neðan.

Síðustu ár hefur verið uppselt á Janúarráðstefnuna og því hvetjum ykkur til að tryggja ykkur miða sem fyrst. Athugið að sérkjör eru á miðaverði fyrir starfsfólk aðildarfélaga Festu og háskólanema.

Sandrine Dixson-Decleve,

forseti The Club of Rome

Halla Tómasdóttir
forstjóri B Team

Sandrine Dixson-Declève er alþjóðlegur leiðtogi og hefur um árabil verið leiðandi í baráttunni gegn loftslagsbreytingum, sjálfbærri þróun, sjálfbærum fjármálum og kerfisbreytingum.

Sandrine hefur komið víða að og haft áhrif um allan heim. Þá er hún höfundur fjölmargra rita og gaf nú nýverið út bókina Earth for All: A Survival Guide for Humanity í slagtogi við hóp vísindafólks. Heimsfrægi vísindamaðurinn Johan Rockström, sem talaði á Janúarráðstefnu Festu 2022, er einn meðhöfunda bókarinnar sem fæst nú í Bóksölu stúdenta. Í bókinni eru dregin þau áhersluatriði sem mannkynið þarf að einblína sér að til þess að þrífast og dafna; orka, fæða, ójöfnuður, fátækt og mannfjöldaþróun.

Sandrine situr í nokkrum alþjóðlegum ráðum á vettvangi Evrópusambandsins og hefur síðan 2018 setið sem forseti The Club of Rome og er hún ásamt Maphela Ramphela fyrst kvenna til að sinna því embætti. The Club of Rome er samfélag fjölbreyttra hugsunarleiðtoga sem bera kennsl á heildrænar lausnir á flóknum alþjóðlegum málum og stuðla að stefnumótun og aðgerðum til að gera mannkyninu kleift að takast á við sínar stærstu áskoranir.

Þá er Sandrine í hópi sérstakra sendiherra Wellbeing Economy Alliance (weall.org), þar sem Ísland er eitt af leiðandi þjóðum.

Sandrine er áhrifamikill og hrífandi hugsuður og því er það sannur heiður að fá Sandrine til Íslands í janúar til þess að taka þátt í Janúarráðstefnu Festu.

TED Countdown fyrirlestur

LinkedIn síða

Höllu Tómasar þarf vart að kynna, en það er óhætt að segja að Halla sé einn áhrifamesti Íslendingurinn á alþjóðavettvangi í dag. Halla er brautryðjandi leiðtogi sem á glæstan feril hér heima og á erlendis; fram­kvæmda­stjóri Viðskiptaráðs, uppbygging Háskólans í Reykjavík, uppbyggingarverkefni eftir hrunið, verkefnin Auður í krafti kvenna og Auður Capital sett á fót, forsetaframboð, stjórnun í alþjóðlegum fyrirtækjum og margt, margt fleira.

Í dag er Halla forstjóri B Team sem er alþjóðlegur hópur leið­toga sem fara fyrir breytingum og betri áherslum í viðskiptum, með vel­ferð fólks og jarðarinnar í huga.

Halla gaf nýverið út bókina Hugrekki til að hafa áhrif. „Það býr leiðtogi innra með okkur öllum og eitt mikilvægasta verkefni lífsins er að gefa þessum leiðtoga rödd og áhrif,“ stendur í upphafi lýsingarinnar um bókina, en í henni deilir Halla reynslu úr lífi og starfi sem og sögum af fyrirtækjum og fólki sem hafa virkjað krafta sína til góðra verka og þannig náð bæði miklum árangri og fundið innri gleði.

Í tilefni Janúarráðstefnunnar mun Unnsteinn Manuel Stefánsson eiga innihaldsríkt og gefandi samtal við Höllu sem verður sýnt á ráðstefnunni.